Formulário de pesquisa

Icaya 62

1Pe abiliŋ pi Cion,

pe bene abiywe pi Jerucalem,

nio waŋ ma locce doŋ ocaro piny calo dero ceŋ

dok larrene bene omenyo piny calo mac.

2Rok ducu bineno locci, in Jerucalem,

ki luker ducu gibineno deyoni;

doŋ gibilwoŋi ki nyiŋ manyen

ma Rwot kikome aye bicako.

3Ibibedo calo tok me deyo ma tye i ciŋ Rwot,

dok ibibedo macalo tok me ker ma nyuto loc pa Lubaŋani.

4Pe doŋ gibimedde ki lwoŋi ni gaŋ ma doŋ gibwoto woko,

loboni bene pe gibilwoŋo ni lobo ma odoŋ obur,

ento gibilwoŋi ni gaŋ ma calo dako ma cwinya yom i kome,

kun gilwoŋo loboni bene ni dako ma ginyomo;

pien Rwot cwinye yom i komi,

dok loboni bibedo macalo dako ma ginyomo.

5Pien kit macalo awobi nyomo nyakoawobeni bene binyomi kit meno,

dok kit macalo lanyom cwinye bedo yom pi nyako ger.

Lubaŋani bene cwinye bibedo yom piri kit meno.

6In Jerucalem, aketo lukur-piny i wi celli malo;

pe gibilin dyeceŋ ki dyewor benebene.

Wun jo ma poyo wi Rwot, pe wuywe,

7dok bene pe wumiye kare me yweyo nio wan,

ma en doŋ omiyo Jerucalem ocuŋ matek

ma doŋ omiyo odoko gin ma gipako i wi lobo ducu.

8Rwot doŋ okwoŋo kwoŋ matek twatwal,

kun kwoŋo ki bade me twer ni,

“Pe dok abimiyo lukworri gicamo kani,

lurok bene pe dok gibimato koŋo vinoni ma in iyelle me tiyo tic pire;

9ento jo ma gukayo kal gibicamo ci gipako iye Rwot,

ki jo ma gupwono olok gibimato koŋo vinone

i dyekal me kabedona maleŋ,”

10Wuwok ki kunnu, wuwok ki i dogcel,

wuyub yo pi lwak;

wutor yo, wutor yo gudo-gu woko,

wucok gweŋ woko bene ki tye,

ka doŋ wuil bendera malo pi rok ducu,

11-Nen, Rwot doŋ otyeko tito lok

man oo wa i agikki lobo, ni, wuwac bot jo Cion ni,

“Nen larrewu doŋ tye ka bino; nen, bakacicce tye bote

cul me ticce bene tye i nyime.”

12Gibilwoŋogi ni gin rok maleŋ,

gin jo ma Rwot okokogi ki i can;

dok bene gibilwoŋini, Gaŋ ma Rwot omaro,

ma pe oweko woko ata.

Baibul 1985

© 1985 The Bible Society of Uganda

More Info | Version Index