Formulário de pesquisa

Icaya 63

Nino me culo kwor pa Rwot

1-Man aŋa ma bino ki i Edommi,

ki i Bojra ma oruko boŋo makwarri,

ma oruko ruk me deyo-ni,

kun tye ka nyatte ki twon tekone madit-ti?

“Meno an ennu atye ka tito lok me loyo kop,

an atek, atwero laro dano.”

2Piŋo kono boŋoni ma iruko-ni kwar,

kun nen calo boŋo pa ŋat ma nyono olok me biyo pige?

3-“Anyono olok i bur me biyo pige an kena,

kun ŋat mo mukene ma oa ki i rok rriapat onoŋo pe bota;

anyonogi woko lirwatrwat ki akemo adada;

pige makwar macalo remo obedo ka kir i koma matek,

omiyo boŋona ducu onywane woko marac.

4Pien nino me culo kwor onoŋo iye i cwinya,

mwaka me koko jona bene doŋ oromo.

5-“Anene piny, ci anoŋo ni pe tye ŋat mo ma twero kenya;

auro twatwal, ento onoŋo pe tye ŋat mo ma romo miya teko;

meno omiyo ciŋa an kikoma aye loyo loc,

akeca aye omiyo anoŋo teko.

6Cen anyono rok mapol woko ducu piny ki kinigana,

akemona omiyo gulimo atwom twatwal,

dok aonyo remogi omol piny i ŋom.”

Rwot onyuto berre bot jo Icrael

7Abitito pi mar pa Rwot ma pe lokke,

kun anyuto pak pa Rwot bene,

pi gin ducu mabe co ma en Rwot otimo piwa,

ki twon ber madit ma en onyuto bot jo Icrael

ma en otimo botgi pi kicane,

kun lubo bene mar mere madwoŋ ma pe lokke.

8Pien en owacci, “Adada, gin jona, litino ma pe gibibwola”;

cutcut en odoko Lalargi.

9I cangi ducu en bene oneno iye can, en kikome aye olarogi,

pe lakwenane mo nyo kadi ki lamalaika.

En okokogi pi mar mere ki pi kicane;

en otiŋogi, ci obedo ka byelogi nino ki nino i kare macon.

10Ento gin gujemo woko i kome, omiyo kiniga omako Rwot,

Cwiny mere maleŋ okumo twatwal.

Pi meno en olokke odoko lakworgi, omiyo en kikome olwenyo kwedgi.

11Dano dok gupo pi kare macon,

i kare pa Moses, ma latic pa Rwot, ci gupenyo ni,

“Ŋat ma yam okwanyo lukwat romine ki i nam-mi tye kwene?

En ŋat ma oketo Cwiny mere maleŋ i kingi-ni kono tye kwene?

12-Ŋat ma yam omiyo ciŋe me deyo owoto i ŋet Moses tuŋ lacuc,

ma omiyo pii opokke dul aryo i nyimgi

wek enoŋ nyiŋ ma ri nakanaka,

13ma otelogi kun giwok ki i dye nam matut-ti?”

Gubedo calo aguragura ma woto i tim,

pe gubedo ka gatte kadi ki acel.

14Cwiny pa Rwot omiyo botgi yweyo,

calo dyaŋi ma guo i luŋ.

Yam itelo joni kumeno,

wek inoŋ kwede nyiŋ me deyo.

Lega pi kica ki kony

15Kul waŋi ki i polo inen piny i lobo,

inen piny ki i kabedoni maleŋ me deyo.

Arimani ki tekki kono doŋ tye kwene?

Mar meri ki kicani kono tye kwene?

Tim ber, pe ikwerwa woko.

16Pien in aye i Wonwa,

kadi bed Abraim pe neyowa,

dok Icrael bene pe paro piwa;

in Rwot giri ibedo Wonwa,

dok ibedo lakokwa cakke yam con.

17Piŋo imiyo waŋak woko ki i yoni, ai Rwot?

Piŋo imiyo wadoko jo ma cwinywa nwaŋ kun pe walwori?

Dwog cen botwa pi jo ma gitiyo piri,

pi kaka ducu ma gubedo meri kikomi.

18Joni maleŋ gubedo i kabedoni maleŋ pi kare manok mo twatwal,

lukworwa doŋ gunyono kabedo man ki tyengi gubalo woko.

19Doŋ wadoko calo jo ma yam in pe iloyogi,

wadoko calo jo ma pe gilwoŋogi ki nyiŋi.

Baibul 1985

© 1985 The Bible Society of Uganda

More Info | Version Index