Formulário de pesquisa

KALATE METATAʼA 26

Izak e sii Befilisteñ

(Met 28:13-15; Met 12:10-20; 20)

1Mfumbale zaé a nga kui e si Izak a nga too, e nyô ôsu a nga boban melu Abraham, ane Izak a nga nga ke e be Abimélék, njô bôte Befilisteñ e Gérar. 2Nti a nga yené be nye a jô na: Te ke Ejipte, tabeʼe e si ma ye kate wo. 3Tabeʼe e si nyô; me ne a wo a ma ye botane wo amu wo a mvoñe bôte jôé, mia ma ye ve mesi mana mese; nalé ate ma ye tôé ngana me nga kan ésoo Abraham. 4Ma ye fôlô mvoñe bôte jôé ane ateté ya yôp; ma ye ve mvoñe bôte jôé mesi mana mese. Meyoñ mese ya *si nyô ma ye bi bibotan amu mvoñe bôte jôé. 5Yaa! Abraham a nga bo tyiñe jam mewôk a nga baʼale abendé dam, minjôane miam, memvinda mam, metiñe mam. 6Nalé ate Izak a nga tabe e Gérar.

7Eyoñe bôte ya afôla te be mbe be siliʼi minsili ajô minga wé, a mbe a jôʼô na: Kale jame le. A mbe a koo woñe ya jô na a mbe minga wé, amu bôte ya valé be zaa wôé nye, amu Rebeka a mbe abeñ. 8Mbôlô éto jé e Gérar é nga langan e nde é nga kui *môs éziñe na Abimélék, njô bôte Befilisteñ, a fombôʼô e vundi, e nde a yen Izak baa minga wé Rebeka be boʼo bivôé. 9Abimélék a nga loon Izak a jô na: Nde a ne ñhe minga wôé! Aval avé ô nga bo nguleya jô na: Kale jame le? Izak a nga yalane nye na: Me nga kobô nalé amu me nga ko woñe ya wu amu nye. 10Abimélék a nga jô nye na: Jé ô nga bo bia jina? E nga liʼi ve tyôtyoé na môt éziñe yʼayoñ a bômbô nye, a ô nga ye bo na bi beʼe mekua. 11Wôna Abimélék a nga ve abendé e be bôte bese na: Nyô ase a ye nnambe môt ate nge minga wé ba ye wôé nye.

Elat a Abimélék

(Sam 112:1-3; Met 21:22-34; Mink 6:7; Mt 5:5)

12Izak a nga bé biôme si été, a a nga kôane mbu ôte mengabe ntet, amu Nti a nga botane nye. 13Môt ate a nga bo kum, a kume jé é nga bo ve bete bet a kui vôme ya bo jôm ébien ba loone kum. 14A nga bili mbame bone biyem a mbame beta biyem a abui bebo bisaé; ajô te Befilisteñ be nga bo nye éviele.

15Menjeñe mese bebo bisaé be ésaa wé be nga fak, melu Abraham, ésaa wé, Befilisteñ be nga mane jine me. 16Abimélék a nga jô Izak na: Kôlôʼô jale dangan, amu wo dañe bia ngul. 17Izak a nga kôlô valé a vule minkan e mone mbiʼili ya Gérar a tabe été. 18Izak a nga beta faʼa menjeñe mendim be nga fak melu mʼésaa wé Abraham, e mme Befilisteñ be nga mane jin mvus awu Abraham. A nga yôlé menjeñe mete môé ésaa wé a nga boʼo a loʼone me. 19Bebo bisaé bʼIzak be nga beta fak, e mone mbiʼili a koone anjeñe vevea mendim. 20Bebaʼale biyem be Gérar be nga té bebaʼale biyem bʼIzak ntañete be jôʼô na: Mendim me ne émangan! Ajô te be nga yôlé anjeñe te jôé na: Esék, amu be nga wôman a nye. 21Bebo bisaé bé be nga faʼa anjeñ afe, be nga jeñe fe ntañete ajô anjeñe te; a nga loon anjeñe te na: Sitna. 22A nga vaa minkane valé a faʼa anjeñ afe, e di e nji beta soo mejô; a nga yôlé de na: Rehôbôt, amu a nga jô na: Nti a veya bia afôla éyoñe ji, a bia ye yaé e si bi too nyô.

23Akôlô ya valé a nga bet e Birséba. 24Nti a nga yené be nye alu te a jô na: Me ne e Zambe Abraham ésoo: te ko woñ, amu ma me ne a wo; ma ye botane wo a fôlô mvoñe bôte jôé, amu mbo ésaé wom Abraham. 25Izak a nga lôñ ataʼa metunaʼa vôm ate a loone jôé Nti. A nga lame *nda éndelé jé valé, a bebo bisaé bé be nga faʼa anjeñe vôm ate.

26Abimélék a nga ke be nye ataté Gérar, a Ahuzat mvôé jé, a Pikol évete nsamba mewosane wé. 27Izak a nga jô be na: Amu jé mia zu be ma amu mia vini ma a na mi nga titane ma nlame wônan? 28Be nga yalane na: Bi lôô na Nti a ne foʼo be wo. Ajô te bia jô na: Ngana éziñ é boʼo zañe jangan, nalé a ne na: E zañe jôé a bia, bia be wo bi tame bo élat 29amu ngana éte, wo ye bo te bo bia mbia jam éziñ, avale fe bi nga bo te bo wo *abé, a na bi nga bo wo ve mvaé a suu wo ô ke *mvoʼé, e wo Nti a botaneya nye éyoñe ji. 30Izak a nga bo be beta dina; be nga di a nyu. 31Wôna, be nga kôlô si ndibe tyé a kanane ngana wua a nyô mbok. Izak a nga suu be be ke, a be nga kôlô be nye *mvoʼé.

32Môse te ôbien, bebo bisaé Izak be nga zu kate nye ajô anjeñe be nga fak, a jô nye na: Bi yeneya mendim. 33Izak a nga yôlé anjeñe te na: Sibéa. Ajô te be nga yôlé tisone jôé na: Birséba, a kui môse ya den.

34Esô, a too mimbu mewôm menyin, a nga luʼu binga môé na: Yudit, ngone Beéri, mone Hitit, a Basmat, ngone Elôn, mone Hitit. 35Be mbe ajô ôlun mfaʼa Izak a Rebeka.

Bible en langue Bulu

© LʼAlliance Biblique du Cameroun, 2007

More Info | Version Index