Formulário de pesquisa

KALATE METATAʼA 27

Izak a botane Yakob

(Met 25:21-24; Hé 11:20; 12:16-17; Met 48:14,17-20)

1Valé Izak a nga bo nnôm, mise mé nteʼan avale ya na a mbe teke fe yen. Ane a nga loon Esô, ntôle monafame wé a jô nye na: A mone wom! Mon a nga yalane nye na: Ma nyô! 2Izak nye na: Me ntoo nnôm, me nji yeme môse ya awu dam. 3Nyoñe ñhe mengale môé éyoñe ji, ékpwaé bibaé jôé a *élaé jôé, kelek afan a bo ma nsôme tit. 4Yame ma jôme ya di avale ma nyeʼe a zaʼa ma je me di, ndembene mamiene ma ye botane wo te na me wu. 5Rebéka a mbe a wôʼôk éyoñ Izak a mbe a kobôʼô mone wé Esô. Esô a nga ke afan asu ya bo nsôme tite na a soo je.

6Ane Rebeka a nga jô mone wé Yakob na: Jame ma te wôk e nde di: Esoo a too a kobôʼô monyoñ Esô a jôʼô na: 7Zaʼa ve ma tit a yame ma bidi ma ye di, a ma ye botane wo asu be Nti awu dam é ngenan te so. 8Eyoñe ji, a mone wom, wôʼôk tyiñe jam a boʼok jam ma bendé wo. 9Kelek nyoñe ma abeñe bone bikela bebaé e mbam, ma ye yam ésoo bidi aval *a nyeʼe. 10Wo ye ke ve ésoo bidi bite a di, ndembene a ye botane wo te na awu dé é so. 11Yakob a nga yalane nyia wé Rebeka na: Yaa, ve mojañ Esô a ne mimvote nyôl ma ke me nji bo nalé. 12Ndôʼôtô na ésaa wom a ye bôlé ma, a ma ye yené e mise mé ane nduʼu bôt; éyoñe te ma ye zuu biyoʼé be mamien saa bibotan. 13Nyia a nga jô nye na: A mone wom, biyoʼé bite bi kpwaʼa ma yôp! Wôʼôk ve tyiñe jam a kele me nyoñe bone bikela. 14A nga ke be nyoñ a zu kee be nyia wé, nye ke ve yame bidi aval ésaa wé a nga nyenyeʼe. 15Wôna Rebeka a nga nyoñe mengômesan mʼEsô, ntôle mone wé, e ma me mbe me dañ abeñ me mbe nye bebé ya toʼé e *nda été, a nga bo na Yakob ébatane mone jé, é jaé me. 16A nga solé mo mé a tyiñe jé é mbe ékôkon a ékôbe bone bikela. 17Mvus éte, a nga kalane ngaé bidi é ne mvaé a belet a nga yam e mo me mone wé Yakob.

18Ane Yakob a nga zu be ésaa wé a jô na: A ésaa wom! Izak nye na: Ma nyô! Ô ne za a mone wom? 19Yakob a nga yalan ésaa na: Me ne Esô ntôle mone wôé; me boya jam wo te jô ma. Kôlôʼô si, ma yeʼelane wo, tabeʼe tôtoo a jaʼak e tite jam, nalé ate womien wo ye botane ma. 20Izak a nga jô mone wé na: A mone wom, aval avôl wo te jiʼa je yen! Yakob nye nye na: Nalé a ne na Nti, e Zambe wôé, a te zuu tite be ma. 21Izak nye Yakob na: Subuʼu ñhe, me bôlé wo, a mone wom, me yem, nge yaa nge momo na, ô ne foʼo mone wom Esô. 22Yakob a nga subu ésaa Izak bebé, nye ve bôlé a jô na: Tyiñ é ne tyiñe Yakob, ve mo me ne mo mʼEsô. 23A nga bo teke nye yem amu mo mé me mbe me bili mimvot ane ma me monyañe wé Esô, a a nga botane nye. 24A nga jô na: Ye wo foʼo le a mone wom Esô? Yakob a nga yalane na: Yaa. 25Izak a nga jô na: Belaʼane ma, me di e tite mone wom, ndembene mamien me botane wo. Ane Yakob a nga ve nye bidi, a Izak a nga di; a nga soo fe nye woon, a a nga nyu.

26Eyoñe te Izak, ésaa wé, a nga jô nye na: Subuʼu ñhe bebé, a lataʼane ma anyu, a mone wom. 27A nga subu bebé a latane nye anyu. Izak a nga wôʼô menyume ya mengômesane mé, wôna a nga botane nye a bifia bi na:

Yaa, menyum me mone wom

me ne ane menyum mʼafube Nti a te botane de.

28Zambe a vaʼa wo mfô mendime ya yôp

a mebuʼubane ya si.

Fôn a mfefé woon abui abui!

29Meyoñ me bôt me kele éjôé jôé si.

A bijôé *meyoñ bi kute meboñe si asu dôé!

Boʼo Masa bobenyoñ.

A e bone be nyua be kute meboñe si asu dôé!

Biyoʼé bi boʼo be nyô a yoʼé wo,

bibotan bi boʼo be nyô a botane wo.

30Izak a maneʼe botane Yakob, a Yakob ke a ngenane te tuʼa mane kôlô bʼésaa Izak na, monyañ Esô ve so nsôm. 31A nga yame fe bidi a nga zu ve ésaa. A nga jô ésaa na: Esaa wom a kôlôʼô si a di tite mone wé, nalé womiene wo ye botane ma. 32Esaa wé Izak a nga jô nye na: O ne za? A nga yalane na: Me ne ntôle mone wôé Esô. 33Beta éndeñelaʼa a nga bi Izak, éndeñelaʼa ja tulan ôkup, e nde a nga jô na: Za ñhe a ne môt a te wôé tit a soo ma je? Me maneya di je ése te na ô so, a me maneya botane nye. Amu ajô te a ye boo ébotan! 34Esô a nga wôʼô nkobô ésaa, a nga yône beta ñyôn, zoñe *nlem é yeʼe bôlé a jô ésaa na: A ésaa wom, botaʼane fe ma! 35Izak a nga yalane na: Monyoñ a te zu a meduʼan a a maneya nyoñe bibotane biôé. 36Esô nye na: Yʼamu be nga yôlé nye na Yakob e nde a tyendé ya ma biyoñe bibaé? A nga taté nyoñe ma éto ntôl, éyoñe ji a nyoñeya ma bibotane biam. A nga beté na: Ye ô nji bi bi botan bi too mbaʼalan asu dam? 37Izak a nga yalan Esô na: Tame yen, me teléya nye Masa wôé, me veya nye bobenyañ bese be bo bebo bisaé bé, a me veya nye fôn a mfefé woon, jé éfe ñhe me ne nguleya bo asu dôé, a mone wom? 38Esô a nga jô ésaa na: A ésaa wom, ye ô bili foʼo vʼébotane te étam? Ma fe, a ésaa wom, botaʼane; ma Esô a nga taté na a yôn. 39Esaa Izak a nga yalane nye na:

Tame yen:

Etabaʼa jôé ja ye jeñeban mebuʼubane ya si

nalé fe mfô mendime ya yôp,

nalé a soʼo yôp.

40Wo ye nyiñ a nkpwaté mekoñe wôé.

A wo ye tabe éjôé monyoñe si:

Ve ndeñan fili wo ye ke wo ndeñe li a li zañ,

wo ye buʼu ébôñeté jé e tyiñe jôé yôp.

Nkeane Yakob

(1 Yo 3:15; Mink 18:19; Met 28:1-10)

41Esô a nga bi Yakob ôvitik e *nlem amu bibotane ésaa a nga botane nye, Esô a mbe a jôʼôk e nleme wé été na: Melu mʼawu ésaa wom me nga zu ma subu a ma ye wôé mojañe wom Yakob. 42Be nga kate Rebeka nkobô Esô, ntôle mone wé, ane a nga loone Yakob, ébatane mone jé, a jô nye na: Tame yene na monyoñ Esô a kômbô kun émiene be wo a wôé wo. 43A mone wom, éyoñe ji, vôʼôlôʼô tyiñe jam! Kôlôʼô si, kele sobô be ndôme jam Laban e Harañ. 44Wo ye tabe be nye nté éziñ, akekui ayaa monyoñ e siseya. 45Eyoñ ayaa monyoñ e kôlôya be wo, a a vuaneya mbia jam ô nga bo nye, ma ye bo wo na ô bulan. Amu jé ma ye jañele mia bebaé môse wua?

Yakob a tup e Mézôpôtami

(Met 27:41-46; 24:1-10; 26:34-35; 36:1-5)

46Rebéka a nga jô Izak na: Enyiñ é vindaneya ma *nlem amu bengone be Hét. Nge Yakob a luʼu ngone Hitit, jia bengone ya *si nyô, ane balé bete, ényiñ ja volô ma jé?

Bible en langue Bulu

© LʼAlliance Biblique du Cameroun, 2007

More Info | Version Index